काठमाडौं । प्रगतिशील लेखक संघ नेपाल वामलेखककाे साझा सङ्गठन हाे । प्रलेसमा आवद्ध हुने वाम पार्टीमा नेकपा (एमाले), नेकपा माओवादी केन्द्र, नेकपा एकीकृत समाजवादी, राष्ट्रिय जनमाेर्चा (नेकपा मसाल), नेकपा (माले), नेकपा गरी ६ पार्टीका साहित्य, कला एवम् सांस्कृतिक फाँटका लेखक-साहित्यकारले पदाधिकारी, सचिवालय, केन्द्रीय सदस्य र राष्टिय परिषदमा भागबण्डा टुङ्ग्याएका छन् ।
शुक्रबार नेकपा (एमाले) निकट सांस्कृतिक फाँटकाे जनसंगठन राष्ट्रिय जनसांस्कृतिक महासंघ नेपालकाे केन्द्रीय कार्यालय बागबजारमा बसेको संयन्त्रकाे बैठकले पदाधिकारीदेखि राष्ट्रिय परिषदसम्मकाे भागबण्डा गरेकाे हो ।
प्रलेसमा पार्टीको आकार अनुसार पदाधिकारीमा नेतृत्वमा आलाेपालाे हुने प्रावधान रहेकाे छ । यसअघि नेतृत्वमा नेकपा माओवादी केन्द्रबाट डा. मधुसूदन गिरी अध्यक्ष र महासचिवमा नेकपा (एमाले)बाट डा. देवि दुलाल क्षेत्री महासचिव थिए ।
तेह्राैं राष्ट्रिय सम्मेलनकाे पूर्वसन्ध्यामा भएकाे पार्टीको भागबण्डामा नेकपा (एमाले)ले अध्यक्षसहित पदाधिकारीमा तीन, सचिवालय सदस्य एक, केन्द्रीय सदस्य ९ र राष्ट्रिय परिषदमा १५ गरी २८ पद पाउने भएको छ । अध्यक्षमा सम्मेलनले औपचारिक घाेषणा गरेपनि हालका महासचिव डा. देवी दुलाल क्षेत्री अध्यक्षमा चुनिने निश्चित जस्तै भएको छ ।
नेकपा माओेवादी केन्द्रबाट महासचिवसहित दुई पदाधिकारी, सचिवालय सदस्य दुई, केन्द्रीय सदस्य सात र राष्ट्रिय परिषद सदस्य १३ गरी २४ पद बाँडफाड गरिएको छ ।
राष्ट्रिय जनमाेर्चा एवम् नेकपा मसालले पदाधिकारीमा एक पद उपाध्यक्ष पाउने भएको छ । विश्वस्त श्राेतका अनुसार बर्तमान उपाध्यक्ष समीर सिंह दाेहाेरिएर उपाध्यक्ष हुने भएका छन् । सिंह एक जना यस अघिको सम्मेलनमा पनि दोहोरिएका एक मात्र पदाधिकारी हुन् ।
सचिवालयमा एक जना, केन्द्रीय सदस्य दुई जना र राष्ट्रिय परिषद सदस्य ५ जना गरी ९ पद नेकपा मसालको लागि सुरक्षित गरिएकाे छ ।
एकीकृत समाजवादी पार्टीलाई पदाधिकारीमा उपमहासचिव एक जना, सचिवालय सदस्य एकजना, केन्द्रीय सदस्य ३ जना र राष्ट्रिय परिषद ६ जना गरी ११ पद दिने सहमति भएको छ ।
नेकपा (माले)ले सचिवालय एकजना, राष्ट्रिय परिषद २ जना गरी ३ पद सुरक्षित गरेकाे छ ।
नेत्र विक्रम चन्द 'विप्लव' नेतृत्वको नेकपाले पदाधिकारी एक जना, सचिवालय एक जना, केन्द्रीय सदस्य दुई जना र राष्ट्रिय परिषद पाँच जना गरी ९ पद पाउने निश्चित गरिएको छ ।
यसरी पदाधिकारी सहित केन्द्रीय समिति ४५ सदस्यीय रहने छ । प्रदेश अध्यक्ष पदेन केन्द्रीय सदस्य हुने व्यवस्था छ भने ३८ केन्द्रीय सदस्य अधिवेशनबाट चुनिने व्यवस्था रहेकाे छ ।
राष्ट्रिय परिषद नामकाे कमिटी ४६ जनाकाे रहने विधानमा व्यवस्था छ । सगाेलमा दुबै कमिटीलाई राष्ट्रिय परिषद नाम दिएर राष्ट्रिय परिषद ९१ जनाकाे हुने बनाईएकाे छ ।
संयन्त्रकाे बैठकमा नेकपा (एमाले)का तर्फबाट प्राडा जीवेन्द्रदेव गिरी, प्रा डा जगत उपाध्याय 'प्रेक्षित' एवम् राष्ट्रिय जनसांस्कतिक महासङ्का अध्यक्ष प्रेमनाथ अधिकारी र उपाध्यक्ष आरसी न्याैपाने थिए ।
नेकपा माओेवादी केन्द्रबाट ईश्वरचन्द्र ज्ञवाली, प्रलेस पूर्व अध्यक्ष एवम् जनसांस्कृतिक महासंघ पूर्व अध्यक्ष मातृका पाेखरेल, डा पुष्करराज भट्ट, डा. केशव सिलवाल रहेका थिए ।
यसरी नै नेकपा मसालका प्रवक्ता रामप्रकाश पुरी रहेका थिए भने एकीकृत समाजवादीबाट प्रलेसका पूर्व अध्यक्ष डा. अमर गिरी, राष्ट्रिय जनसांस्कृतिक महासङ्घ समाजवादीका अध्यक्ष कृपाराम शर्मा धमला एवम् प्रलेसका उपमहासचिव बालमुकुन्द कार्की लगायत रहेका थिए ।
नेकपा मालेबाट डा शालिकराम तिमिल्सेना नेकपाबाट कुशल वोगटी, आरोह नेपालीलगायत भएको बताईएको छ ।
000
https://101khabar.com बाट साभार
